voyoit venir de tout loin. Tellement qu’elle ne peut voir personne, ny personne la voir au visage. Puis est r’amenée en mesme façon, et assise à table, et continuë ainsi voilée iusques à la consommation du mariage, qu’ils vont aux bains, ou s’ils n’y vont, se font ietter vn seau d’eau par dessus la teste : car ils se tiennent soüillé iusques alors, suiuant en cela les Juifs et les Turcs. Il faut qu’ils reçoiuent la benediction d’vn Prestre, ou Moine, auant que d’entrer en leurs Eglises, ou mesme se presenter deuant aucunes images, desquelles vn chacun a bon nombre en sa maison, et en font de mesme toutesfois et quantes qu’ils cognoissent leurs femmes, tout ce que l’on donne en mariage est estimé au double ou au triple, et toute autre chose, et s’il aduient qu’elle meure sans enfans, le mary paye le tout, suiuant l’estimation aux plus proches parens, vn chacun s’estime riche, par le nombre des seruiteurs et seruantes qu’il a, et non par l’argent qu’ils possedent ; ce qu’ils ont retenu des Anciens. Car les seruiteurs desquels ils ont grand nombre, sont esclaues, et demeurent Serfs, tant eux que leurs enfans, aux heritiers de leur premier maistre. Outre ce ils ensuiuent plusieurs choses de l’antiquité comme en leurs escrits, car leurs registres, memoires, et requestes ou supplications, sont roulées en rouleaux, et non enregistrées dans des Liures, ou pliez comme entre nous, et ainsi de tous leurs autres escrits. Ce qu’ils imitent des Anciens, et mesme de la saincte Escriture, comme nous lisons du Prophete Ezechiel ch. 3. Comme aussi