abondance de toutes sortes d’estoffes, à sçauoir drap d’or et d’argent de Perse, de Turquie : toutes sortes de velours, satin, damas, taffetas, et autres estoffes de soye, et à la verité il en faut grande quantité, car tous ceux qui viennent pour seruir l’Empereur ont leur bien-venuë qu’ils appellent, qui consiste en argent, et selon la qualité vne robe de drap d’or, ou autant de velours, satin, damas ou taffetas, pour luy faire vn habit : outre ce, quand il recompense quelqu’vn, soit pour seruice fait à la guerre ou autres, il leur en donne de mesme : aussi ont tous Ambassadeurs venans ou des Tartares et Nogois, ou des Krim, ou quelque autre nation de l’Asie, tant eux que leurs gens, des robes d’estoffes de soye, chacun selon sa qualité, tellement que pour tenir le Tresor tousiours fourny, tous Marchands tant estrangers que Russes, sont obligez d’apporter toutes estoffes et autres choses de valeur au Tresor, et là on voit choisir de tout pour l’Empereur : que s’il se trouvoit qu’ils vendissent, ou celassent, auant l’auoir monstré, pour dix ou douze escus de marchandise, tout le reste seroit confisqué, combien qu’ils eussent payé la gabelle et tous imposts. Ils n’ont nuls mineraux que de fer, lequel est fort doux, combien que ie ne doute pas qu’en vn si grand pays il n’y ait autres minieres, mais ils n’ont personne qui s’y entende.
Il n’y a autre monnoye entre-eux que des Denins ou Copek, qui valent enuiron seize deniers tournois et des Moscofques ou Dengi qui valent huict deniers tournois : item des Polusques qui valent quatre deniers, laquelle monnoye est
