sinon que toute la gendarmerie, tant cauallerie qu’infanterie, est reduite sous Capitaines sans Lieutenans, enseignes, trompettes et tambours. Chaque General a son enseigne particuliere, laquelle se discerne par quelque sainct qui y est peint, elles sont sacrées par le Patriarche, comme autres saincts. Il y a deux ou trois hommes ordonnez à la tenir droite. Outre ce, chaque General a son propre Nabat, qu’ils appellent, ce sont de ces tambours de cuiure, qui se portent à cheual : ils en ont chacun dix ou douze, et autant de trompettes et quelque haut bois, lesquels ne sonnent iamais que lors qu’ils sont prests à donner quelque bataille, ou en quelque escarmouche, hors-mis l’vn des tambours que l’on sonne pour desloger ou monter à cheual.
L’ordre qu’ils tiennent pour descouurir l’ennemy dans ces grandes campagnes de Tartarie, est tel, il y a des chemins qu’ils appellent chemin de l’Empereur, chemin de Krim, chemin du grand camp : outre ce il y a quelques chesnes epars deçà et delà aux campagnes, esloignez de huict, dix, iusques à quarente virst l’vn de l’autre : sous la pluspart desdits arbres, il y a certaines sentinelles, à sçauoir deux hommes auec chacun vn cheual de relais l’vn d’iceux faict sentinelle au dessus de l’arbre, et l’autre faict repaistre les cheuaux la selle sur le dos, ils se rechangent tous les quatre iours ; en cas que celuy qui est au dessus apperçoiue quelques poussieres s’eleuer en l’air, il a ordre de descendre sans rien dire qu’il ne soit monté à cheual, et à bride abbatuë vient au second ar-