NOVVELLE VINGTQVATRIESME.
n la covrt du Roy & Royne de Caſtille (deſquels les noms ne ſeront dicts) y
auoit vn gentil-homme ſi parfaict en beauté
& bonnes conditions, qu’il ne trouuoit
ſon pareil en toutes les Eſpaignes. Chacun
auoit ſes vertuz en admiration, mais encores
plus ſon eſtrange façon : car iamais
on ne cogneut qu’il aimaſt ou ſeruiſt quelque dame, & ſi en
auoit en la court en treſgrand nombre, qui eſtoient dignes de
faire bruſler la glace, mais il n’y en eut point qui euſt puiſſance
de prendre ce gentil-homme, lequel auoit nom Eliſor. La
Royne, qui eſtoit femme de grande vertu, mais non du tout
exempte de la flamme qui moins eſt cogneuë & plus bruſle, regardant
ce gentil-homme qui ne ſeruoit nulle de ſes femmes,
s’en eſmerueilla, & vn iour luy demanda s’il eſtoit poſsible
qu’il aimaſt auſsi peu, qu’il en faiſoit le ſemblant. Il luy reſpondit, que ſi elle voyoit ſon cueur comme ſa contenance, elle ne
luy feroit point ceſte queſtion. Elle deſirant ſçauoir ce qu’il
vouloit dire, le preſſa fi fort qu’il luy confeſſa qu’il aimoit vne
dame qu’il penſoit eſtre la plus vertueuſe de toute la Chreſtienté.
Elle feit tous ſes efforts par prieres & commandemens
de ſçauoir qui elle eſtoit, mais il ne luy fut poſsible : dont
faiſant ſemblant d’eſtre fort courroucée contre luy, iura qu’elle
ne parleroit iamais à luy, s’il ne luy nomoit celle qu’il aimoit
tant : dont il fut ſi fort ennuyé qu’il fut contraint de luy dire
qu’il aimoit autant mourir s’il falloit qu’il luy confeſſaſt : mais
voyant qu’il perdoit ſa veuë & bonne grace par faulte de dire
vne verité tant honneſte qu’elle ne deuoit eftre mal prinſe de
perſonne, luy diſt auec grande craincte : Ma dame, ie n’ay la force
ne hardieſſe de la vous declarer, mais la premiere fois que
vous irez à la chaſſe ie la vous feray veoir, & ſuis ſeur que vous
iugerez que c’eſt la plus belle & parfaicte femme du monde.
Ceſte reſponfe fut cauſe, que la Royne alla pluſtoſt à la chaſſe qu’elle n’euſt faict. Eliſor en fut aduerty & s’appreſta pour l’aller ſeruir
cõme il auoit acouſtumé, & ſi auoit faict faire vn grãd
miroër d’acier en façon de hallecret, & l’ayant mis deuant ſon
