nins ? Certes il n’est pas ainsi, car, comme elle passeoit toutes celles de son sexe de vivacité d’esprit & havoit en un corps féminin un héroïque & virile cœur, ainsi vouloit elle passer le temps aux arts dignes de l’occupation de l’homme & aux honnestes & louables exercices.
Si donc tu eusses voulu sçavoir ce qu’elle faisoit de jour, mesmement en l’absence du Roy de Navarre, son mari, quand elle se trouveoit seule en sa chambre, tu l’eusses veue tenir entre ses mains un livre au lieu de la quenoille, une plume au lieu du fuseau & la touche de ses tablettes au lieu de l’éguille, &, si elle s’appliqueoit ou aux tappis ou à d’aultres ouvrages de l’éguille, qui luy estoit une trèsdélectable occupation, elle havoit près d’elle quelcun, qui luy lisoit ou un Historiographe, ou un Poëte, ou un aultre notable & utile auteur, ou elle luy dicteoit quelque méditation, qu’il mettoit par escrit.
Je diray davantage un acte d’elle, qui pourra possible émerveiller plusieurs personnes qui l’entendront, mais toutefois qui est véritable & qui seroit, s’il en estoit nécessité, confermé par le tesmoignage de maints grands & honorables hommes & femmes, qui comme moy l’ont veu, c’est que bien souvent elle entendoit à son ouvrage &, des deus costés au tour d’elle, deus de ses Secrétaires ou aultres estoient soubs elle occupés, l’un à recevoir des vers françois, qu’elle composoit promptement, mais avec une érudition & gravité admirable ; l’aultre à escrire des lettres, qu’elle envoieoit à quelcun.
Il y en aura qui diront que cela est aliène de l’office & estat de la femme, & pour ceste cause ils blâmeront ce que nous tourneons à grand honneur & estimons fort en Marguerite, mais nous havons nostre response preste. Car aultrefois il y en a eu d’aultres, qui ont esté aveuglés de
