Page:Marguerite de Navarre - L’Heptaméron, éd. Lincy & Montaiglon, tome IV.djvu/230

216

NOTES ET ÉCLAIRCISSEMENTS

ignorant l’emprinse dud. Mesnil, estant en la salle avec ung nommé maistre Thomas Guérin, qui estoit venu pour ses affaires, se disposa aller couscher, dist à ung sien serviteur nommé Colas qu’il luy apportast son cas. Lequel seroit monté en une garde-robe où lad. femme estoit couchée, en laquelle garde-robe led. Dumesnil estoit mucé, qui soudain, craignant estre congneu, seroit sorty l’espée nue en main ; & auroit crié led. Colas : « A l’aide ! C’est ung brigand ! » Et dit aud. S^t-Aignen qu’il avoit veu ung homme incongneu qui sembloit n’y estre pour aucun bien ; lequel S^t-Aignen luy auroict dict : « Il faut savoir que c’est. Appartient-il à personne venir icy à ceste heure ? » Lequel Colas, sur ces termes, seroit allé après led. personnaige, qu’il auroict trouvé en une petite allée près la court de derrière ; lequel personnaige, soudain avoir advisé led. Colas, se seroit efforcé donner de son baston au travers du corps dud. Colas, lequel auroit resisté & donné aud. Dumesnil quelzques coups, pour raison desquelz il auroit crié : « A l’aide ! Au meurdre ! » Sur quoy arriva led. Sainct-Aignen ayant une espée en sa main ; & après y vint led. Guerin ; lequel S^t-Aignen qui encores ne congnoissoit led. Dumesnil pour raison de son vestement desguisé, aussi qu’il faisoit merveilleusement noir ; & trouva led. Dumesnil criant : « Au meurdre ! Confession ! » Auquel cry led. Sainct-Aignen le congneut, dont fut merveilleusement perplex, esbahy & courrossé, de veoir son ennemy à telle heure en sa maison, trouvé en sa garde-robe embastonné. Et ramenant led. Sainct-Aignen à memoyre les peynes & ennuyctz qu’il luy avoit donnez, lui donna led. Sainct-Aignen deux ou troys coups de chaulde colle, puis lui dist : « Hél meschant que tu es, qui t’a icy amené ? Te suffisoit il pas du mal que par venant tu m’as faict ? Je ne le t’avoys pas desservy. » A quoy led. Dumaisnil dist : « Il est vray, je vous ay par trop offensé & suis trop meschant ; je vous en requiers pardon. » Et sur ce, tombe à terre comme mort. Quoy voyant led. Sainct-Aignen, congnoissant le scandalle advenu, demoura sans dire mot, se recommandant à Dieu, & se retira en sa chambre, où il trouva sa femme couschée, qui rien n’entendit. Pour le jour dud. débat, & ung peu aprés, seroit allé veoir que faisoit led. Dumesnil, qu’il auroit trouvé en la court mort & aidé à le porter en l’estable, dont auroit esté led. de Sainct-Aignen trop courrossé. Et sur ce que led. Colas luy demanda qu’il seroit faict du corps, led. de Sainct-Aignen n’entendit à ce propos parce qu’il n’estoit pas maistre de ses premiers mouvemens ; mais seullement dist aud. Colas qu’il en feist ce qu’il verroit bon, & qu’il le convenoit inhumer en terre saincte ou le mectre en la rue ; puis se seroit retiré en sa chambre coucher avec sad. femme,