Puissante clef, delivrant de malheur Ceux qui par mort estoyent mortifiez, Pour s'estre en vous et vostre mort fiez, Vous les avez mis par un doux dormir Hors de la mort qui les faisoit gemir.
Las ! bienheureux est de mort le sommeil, A qui la vie advient à son reveil. Par vostre mort la mort n'est au Chrestien Que liberté de son mortel lien. La mort, qui est aux mauvais effrayable, Elle est aux bons plaisante et aggreable.
Or est donc mort par vostre mort destruite. Hebr. 2. Parquoy, mon DIEU, si j'estois bien instruite, La mort dirois vie, et la vie, mort : Fin de labeur, entrée du seur port : Car de vie la grand'fruition M'empesche trop de vostre vision.
O mort, venez, rompez moy cest obstacle, Ou bien, amour, faites en moy miracle. Puis que par mort encores ne puis voir Mon doux Espoux, par vostre grand povoir Transformez moy en luy toute vivante, Et en repos j'attendray mieux l'attente. Jonas 4. Faites moy donc en luy vivant mourir, Autre que vous ne me peult secourir.
O mon Sauveur, par Foy je suis plantée, Rom. 11. Et par amour en vous, jointe et entée.
