Page:Marot - Les œuvres de Clément Marot, de Cahors, valet de chambre du roy, 1547.djvu/359

La bibliothèque libre.
Cette page n’a pas encore été corrigée


XLIX

De celluy, de qui l'Amye a faict nouvel Amy

Jusque à la mort Dame t'eusse clamée,

Mais ung nouveau t'a si bien reclamée,

Que tu ne veulx qu'à son Leurre venir:

Si ne peulx tu contre moy soustenir,

Pourquoy l'amour deust estre consommée.

Car en tous lieux tousjours t'ay estimée,

Et si on dict, que je t'ay deprimée,

Je dy que non, et le veulx maintenir

Jusque à la mort.

Dieu doint que pis tu n'en sois renommée:

Car s'il est sceu, tu en seras nommée

Femme sans cueur, qui ne se peult tenir

D'aller au change, et à grand tort bannir

Celluy, qui t'eust parfaitement aymée

Jusque à la mort.


L

De l'Amant Marry contre sa Dame

Du tout me veulx desheriter

De ton amours, car proffiter

Je n'y pourrois pas longue espace

Veu qu'un aultre reçoit ta grâce,

Sans mieulx que moy la meriter.

Puis qu'à toy se veult presenter,

De moy se debvra contenter,

Car je luy quitteray la place

Du tout.

Tes grâces sont fort à noter,

On n'y sçauroit mettre, ne oster.

Tu as beau corps, et belle face,