valliers, les dames et damoiselles a leur aise et plus plaisamment. Et fut celluy tournoy si publicquement, haultement et notablement rementeu que chascun le sçavoit certainement, et se esmeurent pour le aler veoir plenté d’hommes des villes voisines et des villages d’environ. Et finablement y allèrent le duc Gerard et sa femme pour le veoir. Et pour le mieulx regarder, se misrent sur le doz d’un petit tertre quy la estoit, et se seirent comme les autres, car moult grant plaisir prenoit le noble duc a veoir bouhourder ; et aussi comme vous sçavez c’estoit son premier mestier. Et si estoit aussi la plaisance des dames de veoir rompre lances, de perchier escus, de couper mailles de haubert et de verser chevalliers et escuiers jambes levées jus des chevaulx. Or estoient la le duc d’Aiglent, le duc d’Ardenne et plusieurs contes, chevalliers, escuiers et nobles hommes du paijs d’Ardenne, d’Allemaigne, du Liege, de Loheraine et d’ailleurs, quy d’armes faisoient autant que a eulx estoit possible, mais quy mieulx s’i porta, qui mieulx s’i contint ne qui le pris conquesta ne racompte point la vraie histoire, car elle ne voeult faire mention que du duc Gerard et de la dame Berthe quy la estoient pour jugier a eulx et parler de ceulx quy joustoient le mieulx. Et advint ainsi que Gerard, quy estoit assez près de Berthe sa femme, laquelle avoit moult longuement (vo) devisé a luy, fut moult ennuyé pour tant qu’il estoit de ce mestier ouvrier et maistre, et mist sa teste ou geron de la duchesse laquelle regardoit moult ententifvement les hourdeis, les paremens des eschaffaulx et les dames et damoiselles quy dessus estoient richement atournées, vestues et parées. Adont il luy souvint que ainsi souloit elle estre et deust ancoires, se raison eust gouverné fortu[n]e ; puis luy souvint de Alexandrine sa suer quy estoit royne de France ; si luy surunda le cœur par telle fachon qu’il en sourdy une eaue quy luy monta jusques aux ieulx, et de la descendirent au long de sa belle fache, tellement qu’elles chaïrent jusques sur le menton de Gerard, son espeux, quy lors la regarda lermoier.
Merveilleusement fut grant le courroux que le noble prince Gerard eust a son cuer quant il percheu la duchesse plourer. Il luy dist lors comme par despit : « Par ma foy, dame, bien perchoy, et plus ne le pouez celer, que ma compaignie vous des-
