Et Jehans el solier remonte ;
Et dame Yfame l’uis li œvre,
Qui molt fu dolente de l’uevre ;
Mès fere li estuet par force.
Et cil entre carchiez el porce ;
Les deniers mist jus qu’il portoit,
Et Jehans, qui là sus estoit,
Par la treillie le porlingne,
Felonessement le rechingne ;
Aval descent tout coiement.
Et cil embraça esraument
Celi por avoir son delit,
Si l’abati en .I. biau lit.
Jehans le vit, moult l’en pesa ;
De la maçue qui pesa
Le fiert tel cop en la caboce,
Ce ne fu pas por lever boce,
Ainz esmie quanqu’il ataint.
Cil fu mors ; la face li taint,
Quar la mort l’angoisse et sousprent.
Et sire Jehans le reprent.
Si le va porter avoec l’autre,
Puis a dit : « Or estes-vous autre ;
Je ne sai s’il vous apartient,
Mès miex vaut compaignon que nient. »
Quant ot ce fet, si s’en retorne ;
Son afère moult bien atorne ;
Les deniers a mis en la huche.
Ez-vous le tiers prestre, qui huche
Tout belement et tout souef.
Page:Montaiglon - Recueil général et complet des fabliaux des 13e et 14e siècles, tome I.djvu/233
Le texte de cette page a été corrigé et est conforme au fac-similé.
200
205
d’estormi
