— Ha ! biaus douz nièz, ci n’a nul conte
Que je ne soie en grant peril.
Revenuz est en no cortil
Li prestres que vous en portastes.
— Par foi, onques puis ne parlastes,
Fet Estormis, que vous mentistes,
Quar orainz à voz iex véistes
Que je l’en portai à mon col :
Je n’en croiroie pas S. Pol,
Oncles, que vous déissiez voir.
— Ha ! biaus douz nièz, venez véoir
Le prestre qui revenuz est.
— Par foi, tierce foie droiz est ;
Ne m’i leront anuit mengier.
Par foi, bien se cuide vengier
Li déables qui le raporte ;
Mès de rien ne me desconforte,
Ne pris .II. oés lor granz merveilles. »
Au prestre vint ; par les oreilles
L’aert, et puis par le goitron ;
Puis en a juré le poistron
Que le provoire renforra,
Ne jà por ce ne remaindra,
S’il a les déables el ventre.
A cest mot en grant paine rentre
Estormis, qui le prestre encarche :
Sovent va maudissant sa carche ;
N’en puet mès, quar forment li griève.
« Par le cuer Dieu, cis fais me criève,
Fet Estormis, je m’en démet. »
Page:Montaiglon - Recueil général et complet des fabliaux des 13e et 14e siècles, tome I.djvu/241
Le texte de cette page a été corrigé et est conforme au fac-similé.
440
213
d’estormi
