Et li clers ne s’oublia pas ;
O la dame s’en vait couchier ;
Ainz ne li lut son nez mouchier
S’ot esté .III. fois assaillie.
Or a Gombers bone mesnie ;
Moult le mainent de maie pile.
« Sire Gombers, dist dame Guile,
Si viez hom comme[1] estes et frailes,
Moult avez anuit esté quailes ;
Ne sai or de qoi vous souvint ;
Pieça mes qu’il ne vous avint ;
Ne cuidiez-vous que il m’anuit ?
Vous avez ausi fet anuit
Que s’il n’en fust nus recouvriers ;
Moult avez esté bons ouvriers ;
N’avez guères esté oiseus. »
Li clers, qui ne fu pas noiseus,
En fist toutes voies ses buens,
Et li lesse dire les suens.
Ne l’en fu pas à une bille
Cil qui gisoit avoec la fille ;
Quant ot assez fet son délit,
Penssa qu’il r’ira à son lit
Ainz que li jors fust escleriez.
A son lit en est reperiez,
Là où gisoit Gombers ses ostes.
Cil le fiert du poing lèz les costes
Grant cop du poing, o tout le coûte
« Chetiz, bien as gardé la coûte,
Fet-il, tu ne vaus une tarte ;
- ↑ 119 — com, lisez comme.
