Page:Montaiglon - Recueil général et complet des fabliaux des 13e et 14e siècles, tome III.djvu/255

La bibliothèque libre.
Le texte de cette page a été corrigé et est conforme au fac-similé.
560
245
du bouchier d’abevile

Qui mout mes bestes esgarda,[1]
Et mout m’enquist et demanda
Qui cis biaus avoirs pooit estre,
Et je li dis : « Sire no prestre ; »
535Cil le[2] m’embla, ce m’est avis.
— Par les sainz Dieu[3], ce fu Davis,
Noz ostes, qui ceenz a jut ;
Bien m’a engingnié et deçut
Qui ma mesnie[4] m’a foutue ;
540Ma pel meïsme m’a vendue ;[5]
De ma mance m’a ters mon nés ;[6]
En mal eure[7] fuisse jou nés.
Quant je ne m’en seuch[8] garde prendre !
On puet cascun jor mout aprendre :
545De ma paste m’a fet[9] tortel.
En connoistroies tu[10] la pel ?
— Oïl, sire, foi que vous doi,[11]
Bien la connoistrai, se la voi ;[12]
Je l’ai eü .VII. anz en garde. »[13]
550Cil prent la pel ; si la regarde ;
Aus oreilles et à la teste
Connut bien la pel de sa beste[14] :
« Haroul las, » dist[15] li pasturiaus ;
« Par Dieu, sire[16], c’est Cornuiaus,
555La beste que je plus[17] amoie ;
En mon[18] tropé n’avoit si coie ;
Foi que je doi à saint Vincent,[19]
N’avoit si cras mouton en cent ;
Mieudres de lui ne pooit estre.
560— Venez ça, dame[20], » dist le prestre,

  1. ↑ 531-534 — Ces vers manquent dans A et C.
  2. ↑ 535 — B, Si le. C, Qui le.
  3. ↑ 536 — B, Par le cuer bleu.
  4. ↑ 539 — B, Et qui m’amie.
  5. ↑ 540 — C, Et ma pel meïsme vendue.
  6. ↑ 541-544 — Ces vers manquent dans A.
  7. ↑ 542 — C, Qu’à bone eure.
  8. ↑ 543 — C, Onques ne m’en soi. — Ce vers et le suivant sont intervertis dans C.
  9. ↑ 545 — B, me fait.
  10. ↑ 546 — B, C, Counisteroies tu.
  11. ↑ 547 — B, Que dites vos, biau sire, avoi. C, Que dites vous, biau sire, à moi.
  12. ↑ 548 — B, Oïe si bien, se je le voi. C, Oïl mout bien, se je ta voi.
  13. ↑ 549-550 — C :

    Il prent ........
    Et la repince et la retaste.

  14. ↑ 552 — C, li paistres sa beste.
  15. ↑ 553 — B, « Ha la ! » ce dist. C, « Harou ! » ce dist.
  16. ↑ 554 — C, Par les yeus bleu.
  17. ↑ 555 — plus. C, mieus. — B, Le beste ou mont que plus.
  18. ↑ 556 — mon. B, no.
  19. ↑ 557-558 — Ces deux vers manquent dans A et C.
  20. ↑ 560 — B, Cha venés, dame.
Récupérée de « https://fr.wikisource.org/w/index.php?title=Page:Montaiglon_-_Recueil_général_et_complet_des_fabliaux_des_13e_et_14e_siècles,_tome_III.djvu/255&oldid=14156398 »