et Protaise à Milan, vn enfant aueugle recouurer la veuë : femme à Carthage estre guérie d’vn cancer par le signe de la croix, qu’vne femme nouuellement baptisée luy fit : Hesperius, vn sien familier auoir chasse les esprits qui infestoient sa maison, auec vn peu de terre du Sepulchre de nostre Seigneur : et cette terre depuis transportée à l’Église, vn paralytique en auoir esté soudain guery : vne femme en vne procession ayant touché à la chasse S. Estienne, d’vn bouquet, et de ce bouquet s’estant frottée les yeux, auoir recouuré la veuë pieça perduë : et plusieurs autres miracles, où il dit luy mesmes auoir assisté. Dequoy accuserons nous et luy et deux S. Euesques Aurelius et Maximinus, qu’il appelle pour ses recors ? sera-ce d’ignorance, simplesse, facilité, ou de malice et imposture ? Est-il homme en nostre siècle si impudent, qui pense leur estre comparable, suit en vertu et piété, soit en sçauoir, iugement et suffisance ?
C’est vne hardiesse dangereuse et de conséquence, outre l’absurde
témérité qu’elle traîne quant et soy, de mespriser ce que nous ne
conceuons pas. Car après que selon vostre bel entendement, vous
auez estably les limites de la vérité et de la mensonge, et qu’il se
treuue que vous auez nécessairement à croire des choses où il y a
cncores plus d’estrangeté qu’en ce que vous niez, vous vous estes
des-ia obligé de les abandonner.Or ce qui me semble apporter
autant de desordre en nos consciences en ces troubles où nous
sommes, de la Religion, c’est cette dispensation que les Catholiques
ont de leur créance. Il leur semble faire bien les modérez et les
entenduz, quand ils quittent aux aduersaires aucuns articles de ceux
qui sont en debat. Mais outre ce, qu’ils ne voyent pas quel aduantage
c’est à celuy qui vous charge, de commancer à luy céder, et vous
tirer arrière, et combien cela l’anime à poursuiure sa pointe : ces
articles là qu’ils choisissent pour les plus légers, sont aucunefois
tres-importans. Ou il faut se submettre du tout à l’authorité de
nostre police ecclésiastique, ou du tout s’en dispenser. Ce n’est pas
à nous à establir la part que nous luy deuons d’obéissance. Et
d’auantage, ie le puis dire pour l’auoir essayé, ayant autrefois vsé
de cette liberté de mon chois et triage particulier, mettant à nonchaloir
certains points de l’obseruance de nostre Église, qui semblent
auoir vn visage ou plus vain, ou plus estrange, venant à en
communiquer aux hommes sçauans, i’ay trouué que ces choses là
