quelqu’vn d’entre eux pour commander. Secondement (ils ont vne façon de leur langage telle qu’ils nomment les hommes, moitié les vns des autres) qu’ils auoyent apperceu qu’il y auoit parmy nous des hommes pleins et gorgez de toutes sortes de commoditez, et que leurs moitiez estoient mendians à leurs portes, décharnez de faim et de pauureté ; et trouuoient estrange comme ces moitiez icy nécessiteuses, pouuoient souffrir vne telle iniustice, qu’ils ne prinsent les autres à la gorge, ou missent le feu à leurs maisons.Ie parlay à l’vn d’eux fort long temps, mais i’auois vn truchement qui me suiuoit si mal, et qui estoit si empesché à receuoir mes imaginations par sa bestise, que ie n’en peus tirer rien qui vaille. Sur ce que ie luy demanday quel fruit il receuoit de la supériorité qu’il auoit parmy les siens, car c’estoit vn Capitaine, et noz matelots le nommoient Roy, il me dit, que c’estoit, marcher le premier à la guerre : De combien d’hommes il estoit suiuy ; il me montra vne espace de lieu, pour signifier que c’estoit autant qu’il en pourroit en vne telle espace, ce pouuoit estre quatre ou cinq mille hommes : Si hors la guerre toute son authorité estoit expirée ; il dit qu’il luy en restoit cela, que quand il visitoit les villages qui dépendoient de luy, on luy dressoit des sentiers au trauers des hayes de leurs bois, par où il peust passer bien à l’aise. Tout cela ne va pas trop mal : mais quoy ? ils ne portent point de haut de chausses.
CHAPITRE XXXI.
e vray champ et subiect de l’imposture, sont les choses inconnues :
d’autant qu’en premier lieu l’estrangeté mesme donne crédit,
et puis n’estants point subiectes à nos discours ordinaires, elles nous
estent le moyen de les combattre. À cette cause, dit Platon, est-il
bien plus aisé de satisfaire, parlant de la nature des Dieux, que
de la nature des hommes : par ce que l’ignorance des auditeurs
preste vne belle et large carrière, et toute liberté, au maniement
d’vne matière cachée. Il adulent de là, qu’il n’est rien creu si fermement,
que ce qu’on sçait le moins, ny gens si asseurez, que ceux
