Aller au contenu

Page:Montaigne - Essais, Didot, 1907, tome 1.djvu/414

La bibliothèque libre.
Cette page n’a pas encore été corrigée

qu’il n’y a de sa façon, à celle d’vn homme, qui n’est vestu que de sa peau. Combien d’hommes, et en Turchie sur tout, vont nuds par deuotion ? Ie ne sçay qui demandoit à vn de nos gueux, qu’il voyoit en chemise en plein hyuer, aussi scarbillat que tel qui se tient ammitonné dans les martes iusques aux oreilles, comme il pouuoit auoir patience : Et vous monsieur, respondit-il, vous auez bien la face descouuerte : or moy ie suis tout face. Les Italiens content du fol du Duc de Florence, ce me semble, que son maistre s’enquerant comment ainsi mal vestu, il pouuoit porter le froid, à quoy il estoit bien empesché luy-mesme : Suiuez, dit-il, ma recepte de charger sur vous tous vos accoustrements, comme ie fay les miens, vous n’en souffrirez non plus que moy. Le Roy Massinissa iusques à l’extrême vieillesse, ne peut estre induit à aller la teste couuerte par froid, orage, et pluye qu’il fist, ce qu’on dit aussi de l’Empereur Seuerus. Aux batailles données entre les Ægyptiens et les Perses, Hérodote dit auoir esté remarqué et par d’autres, et par luy, que de ceux qui y demeuroient morts, le test estoit sans comparaison plus dur aux Ægyptiens qu’aux Perses : à raison que ceux cy portent tousiours leurs testes couuertes de béguins, et puis de turbans : ceux la rases des l’enfance et descouuertes. Et le Roy Agesilaus obserua iusques à sa décrépitude, de porter pareille vesture en hyuer qu’en esté. Caesar, dit Suétone, marchoit tousiours deuant sa troupe, et le plus souuent à pied, la teste descouuerte, soit qu’il fist Soleil, ou qu’il pleust, et autant en dit-on de Hannibal,

tum vertice nudo
Excipere insanos imbres, cælique ruinam.


Vn Vénitien, qui s’y est tenu long temps, et qui ne fait que n’en venir, escrit qu’au Royaume du Pegu, les autres parties du corps vestues, les hommes et les femmes vont tousiours les pieds nuds, mesme à cheual. Et Platon conseille merueilleusement pour la santé de tout le corps, de ne donner aux pieds et à la teste autre couuerture, que celle que nature y a mise. Celuy que les Polonnois ont choisi pour leur Roy, après le nostre, qui est à la vérité l’vn des plus grands Princes de nostre siècle, ne porte iamais gands, ny ne change pour hyuer et temps qu’il face, le mesme bonnet qu’il porte au couuert. Comme ie ne puis souffrir d’aller déboutonné et destaché, les laboureurs de mon voisinage se sentiroient entrauez de l’estre. Varro tient, que quand on ordonna que nous tinsions la teste descouuerte, en présence des Dieux ou du Magistrat, on le fit plus pour nostre santé, et nous fermir contre les iniures du temps, que pour compte de la reuerence.Et puis que nous sommes sur le froid, et François accoustumez à nous biguarrer, (non pas moy, car ie ne m’habille guiere que de noir ou de blanc, à l’imitation de