de son ennemy trespassé, en mena grand deuil, il ne faut pas s’escrier soudain,
Et cosi auen che l’animo ciascuna
Sua passion solto el contrario manto
Ricopre, con la vista hor chiara, hor bruna.
Quand on présenta à Cæsar la teste de Pompeius, les histoires disent qu’il en destourna sa veuë, comme d’vn vilain et mal plaisant spectacle. Il y auoit eu entr’eux vne si longue intelligence, et société au maniement des affaires publiques, tant de communauté de fortunes, tant d’offices réciproques et d’alliance, qu’il ne faut pas croire que cette contenance fust toute fauce et contrefaicte, comme estime cet autre :
Tutùmque putauit
Iam bonus esse socer, lacrymas non sponte cadentes
Effudit, gemitùsque expressit pectore læto.
Car bien qu’à la vérité la pluspart de nos actions ne soient que
masque et fard, et qu’il puisse quelquefois estre vray,
si est-ce qu’au iugement de ces accidens, il faut considérer, comme
nos âmes se trouuent souuent agitées de diuerses passions.Et tout
ainsi qu’en nos corps ils disent qu’il y a vne assemblée de diuerses
humeurs, desquelles celle là est maistresse, qui commande le plus
ordinairement en nous, selon nos complexions : aussi en nostre ame,
bien qu’il y ait diuers mouuements, qui l’agitent, si faut-il qu’il
y en ayt vn à qui le champ demeure. Mais ce n’est pas auec si entier
auantage, que pour la volubilité et soupplesse de nostre ame, les
plus foibles par occasion ne regaignent encores la place, et ne facent
vne courte charge à leur tour. D’où nous voyons non seulement les
enfans, qui vont tout naifuement après la nature, pleurer et rire
souuent de mesme chose : mais nul d’entre nous ne se peut vanter,
quelque voyage qu’il face à son souhait, qu’encore au départir de
sa famille, et de ses amis, il ne se sente frissonner le courage : et
si les larmes ne luy en eschappent tout à faict, au moins met-il le
pied à l’estrié d’vn visage morne et centriste. Et quelque gentille
flamme qui eschauffe le cœur des filles bien nées, encore les despend
on à force du col de leurs mères, pour les rendre à leur espoux :
quoy que die ce bon compagnon,
Estne nouis nuptis odio Venus, ànne parentum
Frustrantur falsis gaudia lacrymulis,
Vbertim thalami quas intra limina fundunt ?
Non, ita me diui, vera gemunt, iuuerint.
Ainsin il n’est pas estrange de plaindre celuy-là mort, qu’on ne voudroit
aucunement estre en vie.Quand ie tance auec mon valet,
