auec luy le danger d’vne grande tourmente, et appelloient le secours des Dieux : Taisez vous, feit-il, qu’ils ne sentent point que vous soyez icy auec moy. Et d’vn plus pressant exemple : Albuquerque Vice-Roy en l’Inde, pour Emanuel Roy de Portugal, en vn extrême péril de fortune de mer, print sur ses espaules vn ieune garçon pour cette seule fin, qu’en la société de leur péril, son innocence luy seruist de garant, et de recommandation enuers la faneur diuine, pour le mettre à bord.Ce n’est pas que le sage ne puisse par tout viure content, voire et seul, en la foule d’vn palais : mais s’il est à choisir, il en fuira, dit-il, mesmes la veue. Il portera s’il est besoing cela, mais s’il est en luy, il eslira cecy. Il ne luy semble point suffisamment s’estre desfait des vices, s’il faut encores qu’il conteste auec ceux d’autruy. Charondas chastioit pour mauuais ceux qui estoient conuaincus de hanter mauuaise compagnie. Il n’est rien si dissociable et sociable que l’homme : l’vn par son vice, l’autre par sa nature. Et Antisthenes ne me semble auoir satisfait à celuy, qui luy reprochoit sa conuersation auec les meschants, en disant, que les médecins viuent bien entre les malades. Car s’ils seruent à la santé des malades, ils détériorent la leur, par la contagion, la veuë continuelle, et pratique des maladies.Or la fin, ce crois-ie, en est tout’vne, d’en viure plus à loisir et à son aise. Mais on n’en cherche pas tousiours bien le chemin. Souuent on pense auoir quitté les affaires, on ne les a que changez. Il n’y a guère moins de tourment au gouuernement d’vne famille que d’vn estât entier. Où que l’ame soit empeschée, elle y est toute. Et pour estre les occupations domestiques moins importantes, elles n’en sont pas moins importunes. D’auantage, pour nous estre deffaicts de la Cour et du marché, nous ne sommes pas deffaits des principaux tourmens de nostre vie.
Ratio et prudentia curas.
Non locus effusi latè maris arbiter, aufert.
L’ambition, l’auarice, l’irrésolution, la peur et les concupiscences,
ne nous abandonnent point pour changer de contrée :
Elles nous suiuent souuent iusques dans les cloistres, et dans les
escoles de Philosophie. Ny les desers, ny les rochers creusez, ny
la hère, ny les ieusnes, ne nous en démeslent :
