le regard des effects, que la vertu, qui généralement soit propre à tous degrez, et à tous ordres.Il y a quelque chose de pareil en ces autres deux philosophes : car ils promettent aussi éternité aux lettres qu’ils escriuent à leurs amis. Mais c’est d’autre façon, et s’accommodans pour vne bonne fin, à la vanité d’autruy. Car ils leur mandent, que si le soing de se faire cognoistre aux siècles aduenir, et de la renommée les arreste encore au maniement des affaires, et leur fait craindre la solitude et la retraite, où ils les veulent appeller ; qu’ils ne s’en donnent plus de peine : d’autant qu’ils ont assez de crédit auec la postérité, pour leur respondre, que ne fust que par les lettres qu’ils leur escriuent, ils rendront leur nom aussi cogneu et fameux que pourroient faire leurs actions publiques. Et outre cette différence ; encore ne sont-ce pas lettres vuides et descharnées, qui ne se soustiennent que par vn délicat chois de mots, entassez et rangez à vne iuste cadence ; ains farcies et pleines de beaux discours de sapience, par lesquelles on se rend non plus éloquent, mais plus sage, et qui nous apprennent non à bien dire, mais à bien faire. Fy de l’éloquence qui nous laisse enuie de soy, non des choses. Si ce n’est qu’on die que celle de Cicero, estant en si extrême perfection, se donne corps elle mesme. I’adiousteray encore vn compte que nous lisons de luy, à ce propos, pour nous faire loucher au doigt son naturel. Il auoit à orer en public, et estoit vn peu pressé du temps, pour se préparer à son aise : Eros, l’vn de ses serfs, le vint aduertir, que l’audience estoit remise au lendemain : il en fut si aise, qu’il luy donna liberté pour cette bonne nouuelle.Sur ce subiect de lettres, ie veu dire ce mot ; que c’est vn ouurage, auquel mes amis tiennent ; que ie puis quelque chose. Et eusse prins plus volontiers cette forme à publier mes verues, si i’eusse eu à qui parler. Il me falloit, comme ie l’ay eu autrefois, vn certain commerce, qui m’attirast, qui me soustinst, et sousleuast. Car de négocier au vent, comme d’autres, ie ne sçauroy, que de songe : ny forger des vains noms à entretenir, en chose sérieuse : ennemy iuré de toute espèce de falsification. I’eusse esté plus attentif, et plus seur, ayant vne addresse foi te et amie, que regardant les diuers visages d’vn peuple : et suis deçeu, s’il ne m’eust mieux
