cognoissans, aussi bien que Socratcs ? Vn qu’on menoit au gibet, disoit que ce ne fust pas par telle rue, car il y auoit danger qu’vn marchant luy fist mettre la main sur le collet, à cause d’vn vieux debte. Vn autre disoit au bourreau quil ne le touchast pas à la gorge, de peur de le faire tressaillir de rire, tant il estoit chatouilleux : l’autre respondit à son confesseur, qui luy promettoit qu’il soupperoit ce iour là auec nostre Seigneur, Allez vous y en vous, car de ma part ie ieusne. Vn autre ayant demandé à boire, et le bourreau ayant beu le premier, dit ne vouloir boire après luy, de peur de prendre la verolle. Chacun a ouy faire le conte du Picard, auquel estant à l’eschelle on présente vne garse, et que, comme nostre iustice permet quelquefois, s’il la vouloit espouser, on luy sauueroit la vie : luy l’ayant vn peu contemplée, et apperçeu qu’elle boittoit : Attache, attache, dit-il, elle cloche. Et on dit de mesmes qu’en Dannemarc vn homme condamné à auoir la teste tranchée, estant sur l’eschaffaut, comme on luy présenta vne pareille condition, la refusa, par ce que la fille qu’on luy offrit, auoit les iouës auallees, et le nez trop pointu. Vn valet à Thoulouse accusé d’heresie, pour toute raison de sa créance, se rapportoit à celle de son maistre, ieune escolier prisonnier avec luy, et ayma mieux mourir, que se laisser persuader que son maistre peust errer. Nous lisons de ceux de la ville d’Arras, lors que le Roy Loys vnziesme la print, qu’il s’en trouua bon nombre parmy le peuple qui se laissèrent pendre, plustost que de dire, Viue le Roy. Et de ces viles âmes de bouffons, il s’en est trouué qui n’ont voulu abandonner leur gaudisserie en la mort mesme. Celuy à qui le bourreau donnoit le branle, s’escria, Vogue la gallee, qui estoit son refrain ordinaire. Et l’autre qu’on auoit couché sur le point de rendre sa vie le long du foier sur vne paillasse, à qui le médecin demandant où le mal le tenoit ; Entre le banc et le feu, respondit-il. Et le prestre, pour luy donner l’extrême onction, cherchant ses pieds, qu’il auoit reserrez et contraints par la maladie : Vous les trouuerez, dit-il, au bout de mes iambes. À l’homme qui l’exhortoit de se recommander à Dieu, Qui y va ? demanda-il : et l’autre respondant. Ce sera tantost vous mesmes, s’il luy plaist : Y fusse-ie bien demain au soir, repliqua-il : Recommandez vous seulement à luy, suiuit l’autre, vous y serez bien tost : Il vaut donc mieux, adiousta-il, que ie luy porte mes re-
