parolles que la mémoire preste à nostre langue : et espérons en tirer vne expiation de nos fautes. Il n’est rien si aisé, si doux, et si fauorable que la loy diuine : elle nous appelle à soy, ainsi fautiers et détestables comme nous sommes : elle nous tend les bras, et nous reçoit en son giron, pour vilains, ords, et bourbeux, que nous soyons, et que nous ayons à estre à l’aduenir. Mais encore en recompense, la faut-il regarder de bon œil : encore faut-il receuoir ce pardon auec action de grâces : et au moins pour cet instant que nous nous addressons à elle, auoir l’ame desplaisante de ses fautes, et ennemie des passions qui nous ont poussé à l’offencer. Ny les Dieux, ny les gens de bien, dict Platon, n’acceptent le présent d’vn meschant.
Immunis aram si tetigit manus,
Non sumptuosa blandior hostia
Molliuit auersos Penates,
Farre pio et saliente mica.
CHAPITRE LVII.
e ne puis receuoir la façon, dequoy nous establissons la durée
de nostre vie. Ie voy que les sages l’accoursissent bien fort au prix
de la commune opinion. Comment, dit le ieune Caton, à ceux qui
le vouloyent empescher de se tuer, suis-ie à cette heure en aage,
où Ion me puisse reprocher d’abandonner trop tost la vie ? Si n’auoit-il
que quarante et huict ans. Il estimoit cet aage là bien meur
et bien auancé, considérant combien peu d’hommes y arriuent. Et
ceux qui s’entretiennent de ce que ie ne sçay quel cours qu’ils
nomment naturel, promet quelques années au delà, ils le pourroient
faire, s’ils auoient priuilege qui les exemptast d’vn si grand nombre
d’accidens, ausquels chacun, de nous est en bute par vne naturelle
subiection, qui peuuent interrompre ce cours qu’ils se promettent.
Quelle resuerie est-ce de s’attendre de mourir d’vne défaillance
de forces, que l’extrême vieillesse apporte, et de se proposer ce but
à nostre durée : veu que c’est l’espèce de mort la plus rare de toutes,
et la moins en vsage ? Nous l’appellons seule naturelle, comme si
c’estoit contre nature, de voir vn homme se rompre le col d’vne
cheute, s’estoufer d’vn naufrage, se laisser surprendre à la peste
ou à vne pleurésie, et comme si nostre condition ordinaire ne nous
presentoit à tous ces inconuenients. Ne nous flattons pas de ces
beaux mots : on doit à l’auenture appeler plustost naturel, ce qui
