Page:Montaigne - Essais, Didot, 1907, tome 1.djvu/84

64

ESSAIS DE MONTAIGNE.

leurs instructions si contraires, que deuient ce bel art ? Outre ce qu’imprudemment ils se desferrent eux-mesmes si souuent : car quelle mémoire leur pourroit suffire à se souuenir de tant de diuerses formes, qu’ils ont forgées en vn mesme subiect ? l’ay veu plusieurs de mon temps, enuier la réputation de cette belle sorte de prudence : qui ne voyent pas, que si la réputation y est, l’effect n’y peut estre.En vérité le mentir est vn maudit vice. Nous ne sommes hommes, et ne nous tenons les vns aux autres que par la parole. Si nous en connoissions l’horreur et le poids, nous le poursuiurions à feu, plus iustement que d’autres crimes. Ie trouue qu’on s’amuse ordinairement à chastier aux enfans des erreurs innocentes, très mal à propos, et qu’on les tourmente pour des actions téméraires, qui n’ont ny impression ny suitte. La menterie seule, et vn peu au dessous, l’opiniastreté, me semblent estre celles desquelles on deuroit à toute instance combattre la naissance et le progrez, elles croissent quand et eux : et depuis qu’on a donné ce faux train à la langue, c’est merueille combien il est impossible de l’en retirer. Par où il aduient, que nous voyons des honnestes hommes d’ailleurs, y estre subiects et asseruis. I’ay vn bon garçon de tailleur, à qui ie n’ouy iamais dire vne vérité, non pas quand elle s’offre pour luy seruir vtilement. Si comme la vérité, le mensonge n’auoit qu’vn visage, nous serions en meilleurs termes : car nous prendrions pour certain l’opposé de ce que diroit le menteur. Mais le reuers de la vérité a cent mille figures, et vn champ indefiny. Les Pythagoriens font le bien certain et finy, le mal infiny et incertain. Mille routtes desuoyent du blanc : vne y va. Certes ie ne m’asseure pas, que ie peusse venir à bout de moy, à guarentir vn danger euident et extresme, par vne effrontée et solenne mensonge. Vn ancien père dit, que nous sommes mieux en la compagnie d’vn chien cognu, qu’en celle d’vn homme, duquel le langage nous est inconnu. Vt externus alieno non sit hominis vice. Et de combien est le langage faux moins sociable que le silence ?Le Roy François pre-