Ces hommes là avoir mis leurs deniers
Dessus leur table entassez à miliers,
Incontinent ilz prendront leur volée
Et là sans peur ilz raviront d’emblée
Le juste prix de leurs veuz presentez
Et non tenus envers vos majestez.
Ainsi vous, Dieux, par nostre bénéfice,
Ne perdrez point le promis sacrifice.
Or pour autant qu’aux cieux vous demeurez
Et que jamais vos faces ne monstrez,
Les hommes vains qui en leur esprit croyent
N’estre point veuz d’autant qu’ilz ne vous voyent,
Ne vont craignant, voire en plein jugement,
De parjurer vostre nom par serment,
Et à fureur ainsi ilz vous provoquent
Faschez de voir que de vous ilz se mocquent :
Si que souvent pour le crime d’aucun
Vous punissez tout un peuple en commun,
Et ne mettez aucune difference
Entre le bon et celuy qui offense ;
Mais vous estans noz amys et voisins,
Quand nous verrons que les hommes malins
En jugement ou autre lieu vous jurent
Et que menteurs laschement se parjurent,
Pleins de desdaing vers eux nous volerons
Et d’ongles torstz les yeux leur creverons.
Je suis d’advis que la paix se compose.
Et non pas moy, sinon en ceste chose
Que les Cocus, pour estre nos amys,
Seront par nous en leurs honneurs remis,
Mais que Coquard pour espouse et amye
Doibve obtenir Dame Zelotypie
