Dis, Jean Cocu, nous voudrions sçavoir
Qu’est cest Oyseau ainsi marqué de noir ?
C’est un Cocu.
Comment, un Cocu ?
Voire.
Tes beaux Cocus ont doncq’ la plume noire,
Grise, tannée et grivelée aussi ?
Non tous Cocus, ains seullement ceux-cy,
Qui sont nyays, vivant toute l’année
Dedans leur nid qui est la cheminée,
Dont cestuy-là en est un bien parfaict,
Nyays Oyseau et nyays par effaict,
Gros enfroigné, gros tendrier inutile,
Tout renfroigné, tout sot, tout mal habile,
De tous plaisirs retraint et desnué,
Un lourd vilain, un Cocu cocué.
J’en voy encore un autre qui luy semble,
Et de plumage et de couleur ensemble,
Sinon qu’il a comme une mitre au front.
Aussi est-il de ces Cocus qui sont
Oyseaux de marque et prisez davantaige,
Pour avoir sçeu que c’est que Cocuaige ;
