On vit entrer ce iour-la ſix crocheteurs chargez
d’armes dans le Louure : dequoy Teligny auerti
par le trompette de l’Amiral, reſpõdit, Que
c’eftoyent des peurs qu’on ſe donnoit ſans occaſion :
qu’il eſtoit treſaſſeuré de la bonne intentiõ
du Roy, qu’il cognoiſſoit fort bien ſon cœur &
ſes affections : qu’on ne deuoit pas ſe faire accroire
des choſes tant hors de propos. Ie croy que Teiligny
ny penſoit aucun mal, d’autant que le iour
deuant la bleſſeure de l’Amiral, on auoit ordonné
certain combat & aſſaut, qu’on deuoit donner
à vn chaſteau, qui pour ceſt effect deuoit eſtre
dreſſé, à quoy les courtiſans eſtoyent conuiez de
ſe preparer.
Le Roy, pour aſſembler les ſeigneurs & gentils
hommes Huguenots en vn quartier, leur fit à tous
marquer logis pres celuy de l’Admiral, pour luy
eſtre plus pres & à poinct : quelques vns y allerẽt
loger, les autres ne peurent ſi toſt changer de
logis.
Le comte de Montgomery, Briquemaut le
pere, & quelques autres gentils hommes, auoyent
mandé à Teligny, que s’il vouloit, ils iroyent volontiers
veiller au logis de l’Amiral : mais Teligny
les remerciant, leur manda qu’il n’eſtoit ia de
beſoin.
Cependant les autres veilloyent : le Cheualier
d’Angouleſme (qui ne ſe voulut point aller coucher) entretenant ſes plus intimes amis, leur donnoit
bon courage, les aſſeurãt qu’il ſeroit ce iour
la Amiral de France : mais il fut trompé, d’autant
que l'eſtat vaquãt fut dõné au marquis de Villars.
