on cognoiſt quelle n’a point eſté receuë comme refugiee ny donné aucune foy : Mais c’eſt au contraire : ſi elle auoit eſté receue à refuge & promeſſe donnee, on luy pourroit imputer d’auoir conſpiré contre celle qui luy auoit vſé de ceſte grande humanité : à preſent n’ayant receu aucune humanité de la royne d’Angleterre, elle ne luy eſt de rien obligee, voire que pour luy auoir vſé de ceſte rigueur & n’auoir exercé en ſon endroit, ceſte generoſité & beneficence royale, comme les Rois dont i’ay parlé, elle auroit occaſion d’en prendre vengeance : Comme fit d’vn roy d’Hõgrie quatrieme, Federic duc d’Auſtriche, qui ayant fuy vers luy apres la deſroute d’vne bataille gaignee ſur luy par les Tartares : il le retint priſonnier, & le contraignit luy bailler d’argent & trois Comtez prochains d’Auſtriche. En fin eſtant deliuré, luy fit la guerre, & le tua à vne bataille. Il eſt certain que la royne d’Eſcoſſe a eſté touſiours ſous bonne & ſeure garde, iamais n’a eſté en liberté ſous ſa foy : vn priſonnier qui n’eſt point ſur ſa foy & à qui on a baillé garde : il ne peut eſtre blaſmé de recercher ſa retraicte par toutes les voyes qu’il eſt poſsible. Meſmement qu’elle dira auoir eſté iniuſtement faicte priſonniere : Car où l’on pretend qu’elle ſoit priſonniere de iuſtice, ou de guerre : autre tiers moyen agile ne s’en peut trouuer : d’eſtre priſonniere de iuſtice, i’ay deſia dit qu’elle n’eſt iuſticiable de la royne d’Angleterre : Par ainſi elle ne peut eſtre priſonniere de iuſtice en Angleterre, par ce que le fondement d’vne vraye iuſtice y
deffaut, c’eſt la puiſſance du Iuge : D’eſtre priſon-
