eſt bien conſiderable pour auoir compaſsion de
la royne d’Eſcoſſe. Auſsi vraye iuſtice doit eſtre
accompagnee de compaſsion, & vuide de
toute cholere, malice & cruauté. Mais que pour
vne pitié, il faille au lieu de iuſtice faire iniuſtice :
& s’il faut auoir pitié, en auoir plus d’vne ſeule
perſonne, que de tout l’eſtat vniuerſel, ce ſeroit
meſurer à fauſſe meſure, & poiſer à faux poids la
clemence, & l’humanité, car s’il faut eſtre pitoyable,
ce ſeroit pluſtoſt eſtre cruel, que humain,
pour ſauuer vn particulier, que on n’aye point de
pitié de tout vn peuple, de tant de nobleſſe, de tãt
de familles, deſquels la mort, le pillage, la ruine,
& la miſere eſtoit toute proiettee par ceſte conſpiration,
& ne ſcauroyent eſtre aſſeurez que par
la punition du chef de la coniuration.
Il y a eu des Empereurs qui ont pardonné les
conſpirations : Veſpaſien les meſpriſoit toutes,
par ce qu’il s’eſtoit perfuadé, qu’il ſcauoit le iour,
heure, & eſpece de ſa mort.
Ce ſont des exemples dãgereux à imiter : comme
de ce pere, qui ayant deſcouuert que ſon fils
le vouloit tuer, le mena en lieu où il eſtoit ſeul,
luy baille l’eſpee, luy dit qu’il le tuaſt, s’il vouloit.
Il y a plus de temerité en tels exemples, que de
clemence.
Mais en ce fait : il y a vne conſideration plus
importante, que en tous les exemples qui ſe peuuent
propoſer : & qui met du tout la Royne hors
de puiſſance d’vſer de clemence en ceſt endroit,
ſans offenſer Dieu : Car il n’eſt pas icy queſtion,
d’vne conſpiration qui n’apportaſt autre change-
