Toutes les autres villes de la France pareillement
ſont ſoumiſes ſous des conditions & auec
ſpeciaux priuileges, qu’on leur a iuré & promis.
Puis que celuy à qui elles ſont ſoumiſes, n’obſerue
ce qu’il a promis, & qu’il n’y a point de moyen
d’auoir vn iuge, pourquoy ne leur ſera-il loiſible
de ſe diſtraire de telle ſuiection ? Et de ſe faire à
vn beſoin iuſtice à eux-meſmes de tant de concuſſions,
extorſions, violences, paillardiſes, cruautez,
trahiſons & autres telles infametez, deſquelle les
brigans & volleurs abuſans du ſacré nom de Roy,
de Pieté & de iuſtice, commettent en leur endroit.
Ioram fils de Ioſaphat ayant ſuccedé à ſon pere
au royaume de Iuda, introduiſit les dieux eſtrãges
& le ſeruice des Idoles parmi le peuple. Lobna
ville ſacerdotale en Iuda voyant cela, ſe retira
de luy pour ne plus eſtre ſous la main de Iorã :
pource, ce dit l’Eſcripture, qu’il auoit delaiſſé
Dieu le Seigneur de ſes peres. 2.Chron.21.
Il n’y a nulle doute qu’entre nous, les loix diuines
ne doiuent eſtre en plus grand poix & eſtime
que les humaines.
Le Magiſtrat eſt eſtably pour eſtre en terreur
aux meſchans. Ceux-là ſont plus meſchans, qui
violent les loix diuines, que ceux qui ſimplement
contreuienent aux loix humaines. Or s’il eſt
permis de ſe ſouſtraire du magiſtrat violant la police
humaine, à plus forte raiſon de celuy qui a
violé toutes choſes ſainctes, voire l’humanité meſmes,
qui a deſpouillé toutes affections naturelles,
ſecoué entant qu’en luy eſt tout ioug et cognoiſ-
