moins de ſe deffendre contre l’inuaſion de ſes ſatellites,
concuſsion de ſes officiers, oppreſsion de
ſes gabelliers, violences & infametez de ſa cour :
Et, pour le dire en vn mot, contre tout ce qui procede
de luy & de ſes Ianniſſaires.
Et tant s’en faut qu’en ſe deffendant, ou retirant
du tyran, on acquiere le nom de ſeditieux,
qu’au contraire ceux-là ſont treſmauuais concitoyens,
compatriotes, & mauuais voiſins, qui ne
s’adioignent à eux.
Le pol. Cela eſt hors de difficulté, que ceux qui
deſirent la conſeruation de la France, & ſur tout
de l’Egliſe de Dieu, ſe doiuent ioindre à eux. Et
aſſeure toy, que ceux qui par couardie, ou autrement
laiſſent les ſecourir, orront vn iour & à bon
droit prononcer la ſentence contre eux, que Debora
donna contre la ville de Meros, pourtant
qu’elle ne vint point à l’aide du Seigneur cõtre Iabin
roy de Chanaan. Iug.5.22.& 23.
Cependant le Seigneur ne lairra point de faire
ſon œuure, pour paracheuer leur entiere deliurance,
comme il a commencé, ainſi que ie te diray.
Mais ie te prie paracheue ce que tu as à dire,
& te deſpeche, afin que i’aye auſsi quelque peu de
loiſir de t’entretenir de ce qui s’eſt paſſé en mon
voyage.
L’hi. Ie le veux bien : que pleuſt à Dieu que les Seigneurs
des cantõs Papiſtes t’euſſẽt ouy diſcourir
en plein Cõſeil de la iuſtice de la cauſe de nos freres,
de la puiſſance des magiſtrats, & iuſques où elle
s’eſtend. Ie m’aſſeure que cela ioint auec les autres
occaſions qu’ils ont de tenir pour ſuſpectes
