Traiſtre, Maquereau & Ruffien
Ne peut faillir d’auoir du bien.
De par le gibet, c’eſt le moyen de paruenir. La
Royne mere ayãt receu ceſtuy-là, dont tu parles,
entre ſes premiers eſtallons, la recognu eſtre vn
digne inſtrument pour illuſtrer la grandeur de ſa
race, & la Maieſté de ſes enfans, pour redreſſer les
ruines de la France, & pour appuyer & ſouſtenir
ce poure Royaume, que ceux de Guyſe auoyent
tant esbranlé : qui, lequel donques ? ce Landry, ce
fils de putain du Peron : la male peſte qui le creue auec
ſa dame Brunehaut, repliquoit vn autre
poure homme : ils ont fait eux deux plus de mal
que ne firent iamais enſemble tous les Lorrains
& les Guiſars : ce n’eſtoit lors que belles roſes
au prix des ronces, dont ceux cy eſgratinoyent
le poure peuple. Et puis les Lorrains, les Guiſars,
ce ſont des Princes appartenans en pluſieurs
ſortes à la France : & poſsible auſsi que la France
leur pourroit bien appartenir.
Mais ces deux-cy ces Florentins, auec l’aſne
qu’ils ont choiſi, ce meſchant bougre de Chancelier :
ces trois Italiens tant fameux, chacun ſcait
d’où ils ſont venus : mais on n’entend pas leurs menees.
Ie ne ſcay pas s’on les entend, diſoit vn autre,
ſi ſcay-ie bien qu’on eſt biẽ ladre s’on ne les ſent.
Ce ſont ceux là qui nous ont remis auec le
Gonſage, & Lanſac, ainſi auant dedans les miſeres
& calamitez, qui nous accableront tous enſemble.
