qui combattent de gayeté ou pluſtoſt de malice
de cœur ſans y eſtre contraints, & fera qu’à la fin
perſonne ne voudra venir à la guerre, ou porter
armes contre nous quelque commandement que
le tyran leur en face, nous voyans ainſi reſolus.
Deſia y en a-il beaucoup qui ſe tienent bien loin
des coups & tirent leur eſpingle arriere, aimans
mieux eſtre reputez couard & recreus, que fols &
meſchans tout enſemble, en ſe faiſans battre à credit.
Surquoy ie te veux dire vn trait, qui paſſe encores
bien plus outre, du ieune Candole, que tu
cognoiſſois beau-frere de ceux de Montmorency.
Eſtant en l’armee que le mareſchal Danuille
auoit aſſemblé deuant Sõmieres que les noſtres
tenoyent, & qu’ils ont rendu à la fin, ſous honneſte compoſition,
que Danuille a gardee aux noſtres,
dont le tyran ne luy ſcait point de gré. Eſtãt
dis-ie là au camp ce ieune ſeigneur de Candole,
& voyant tant de ſeigneurs, capitaines, gentilhommes
& ſoldats que les noſtres faiſoyent mourir
en ſe deffendant vaillammẽt, il a dit & beaucoup
de fois à ſon beau-frere Danuille en iurant &
blaſphemant : hé que nous ſommes fols mon frere
de nous faire ainſi bleſſer, battre, meurtrir &
tuer à l’appetit de ces meſchans (parlant du tyrã,
de ſa mere, de ſes freres & conſeillers) qui nous
ont meurtri nos parens, nos amis & nos alliez ! Et
qui nous payeront auſsi quelque iour en meſme
monnoye.
L’hi. Ce trait vaut bien qu’on s’en ſouuiene : Cãdole
auoit bon iugement. Mais qu’eſt il deuenu
le poure homme ?
Page:Reveille-matin des François, 1574.djvu/333
Le texte de cette page a été corrigé et est conforme au fac-similé.
127
D I A L O G V EI I.
