le Gonzague duc de Neuers, le marquis du Maine,
Clermont, le Gas, & vn grand nombre d’autres
aſſaillans furent bleſſez & plus de trois cens
tuez. C’eſt ce bouleuard que l’ennemy fit ſapper
& miner, duquel vn grand quartier ſe renuerſa
par deuers les Rochellois qui rendit l’endroict
plus fort que deuant : les autres quartiers de pierre,
les pieces de bois & ruine de la terre, renuerſerent
tous dans les trenchees de l’ennemy, choſe
qui fit perdre la vie à plus de deux cens d’entr’eux
choſe qui eſtoit fort horrible de voir emporter
en l’air les bras, iãbes, & autres membres de Meſſieurs
nos ennemis, & d’en voir tirer vn grand nõbre
deſſous les ruines de la mine. C’eſt ce bouleuard
duquel (eſtant batu de nouueau & eſtant de
nouueau miné & aſſailli en grande diligence par
les Capitaines & ſoldats de l’ennemy, ainſi qu’ils
eſtoyent preſques au deſſus) ils furent repouſſez
par trois fois & contraints par les noſtres de ſe retirer
à leur courte honte, & grand perte de nos ennemis.
C’eſt auſsi ce bouleuard ſur lequel quelques
troupes des ennemis eſtans montees, & ayãt
trouué vn Corps de garde des noſtres endormy,
le tuerent & mirent en pieces, l’onzieme du mois
de May. Ce nõobſtant ce bouleuard eſt touſiours
demouré aux noſtres.
Tout cecy que ie te viens de dire, tu le verras
au diſcours meſmes que nos ennemis en ont fait.
L’hi. C’eſt vn bouleuard remarquable, & croy
moy, ce n’eſt ſans emphaſe & ſans vn myſtere caché
que ce nom-là de l’Euãgile luy a ainſi eſté impoſé.
A y regarder de bien pres il a produit meſ-
