Partant dreſſerent vne requeſte bien ample
pleine de toutes ſortes de raiſons diuines & humaines,
& de moyẽs encore plus amples propres
à eſtablir la paix : & ainſi faicte & ſignee ils la baillerent
à leur Roy pour la preſenter au tyran. Mais
à ce qu’on m’a fait entendre, on les renuoya tous
à Mets : où le tyran auec ſa cour alloit accompagner
ſon frere qui s’en alloit en ſon exil, où Dieu
la voulu releguer, pour le bien de chacũ de nous.
Que Dieu doint à ces bonnes gens autant de biẽ
& de bonheur, que nous auons ſouffert de mal,
de malheur & de mal encontre ſous ceſte race de
tyrans.
L’hi. Amẽ, par ſa grace. Ie ſerois treſmarry qu’ils
euſſent le moindre mal de tous les noſtres. Mais
ie te prie dy moy vn peu, eſt-ce tout ce que tu as
apprins durant le temps de ton voyage ?
Le pol. C’en eſt bien la plus grande partie. Mais
encor y a-il quelque trait, que i’ay apprins, Dieu
ſoit loué, qui te ſeruira à l’hiſtoire : & à monſtrer
de plus en plus l’honneſteté de nos Valois.
L’hi. Ie te prie, amy, dy le donques, & ne crain pas
que ie le cache. Leurs actes ont bien merité
qu’on n’attende apres leur mort à dire leur vilaine
vie.
Le pol. Tu dis vray : & c’eſt vne hõte, au lieu qu’vn
chacun deuſt crier à l’eau, au feu, à l’arme, à l’aide
contre ces traiſtres malheureux, qu’il s’en trouue
encor’ de si laſches qui n’oſent leur tenir propos
qu’en leur diſant voſtre clemence, voſtre bonté,
voſtre douceur, voſtre Maieſté treſchreſtiene : ores
qu’ils ſachent qu’il n’y a ſchelmes plus vilains
