& neantmoins ſe craindre de luy plus que de
tout homme du monde : auoir touſiours l’œil au
guet, l’oreille aux eſcoutes pour eſpier d’ou
viendra le coup, pour deſcouurir les embuſches,
pour ſentir la mine de ſes compagnons,
pour aduiſer qui le trahiſt, rire à chaſcun, ſe
craindre de tous, n’auoir aucun, ny ennemy
ouuert, ny amy aſſeuré, ayant toujours le viſage
riant & le cœur tranſy, ne pouuant eſtre ioyeux,
& n’oſer eſtre triſte.
Le pol. Tu as deſcrit en deux mots, la vie de ces
miſerables. Mais pour en parler à bon eſcient &
ne plus flatter le dé, comme l’on dit, tout ainſi
que la Repub. de laquelle les Roys philoſophent
ou en laquelle les Philoſophes ſont gouuerneurs
(ſelõ le dire de Platon) eſt heureuſe ſur toutes autres :
Et que c’eſt vn treſgrand heur d’eſtre ſuiet à
vn bon Prince qui ſoit ſuiet à la loy, laquelle ait
pour ſeure garde de peur qu’elle ne ſoit violee,
quelques eſtats ou parlemẽs. Ainſi que iadis
noſtre Frãce, & cõme encores quelques vns de nos
voiſins l’ont pour le iourd’huy parmy eux. Auſſi
eſt-ce vne grãde miſere de demeurer ſous la ſeruitude
d’vn tyran, chaſſeur deſloyal, & d’vn conſeil
de meſme eſtoffe, qui ne garde ni foy, ni loy, aucune
equité ou droiture, non pas meſme l’humanité,
ni les loix que nature imprime dans le cœur
des plus mallotrus. C’eſt (di-ie) vn extreme malheur
non ſeulemẽt pour les Courtiſans : ains auſſi
pour tous les François de quelque religiõ & condition
qu’ils ſoyẽt d’eſtre ſuiets à vn maiſtre, duquel
on ne peut iamais s’aſſeurer qu’il ſoit bon,
