nue, qui iamais fut en France : la Royne-mere la
recueillit comme ſa treſchere ſoeur : toute la cour
en ſomme, s’en reſiouiſſait, en double façon.
Le mariage du prince de Nauarre, auec Madame
ſœuer du Roy, fut (apres pluſieurs menées, &
difficultez faites ſur la forme des ceremonies) enfin
conclu & arreſté : & auiſé que les promeſſes
des eſpoux à venir, ſeroyent receuës par le cardinal
de Bourbon, hors des ceremonies de l’egliſe
Romaine, pour ne point forcer la conſcience du
prince de Nauarre Huguenot. Quelque temps apres,
la royne de Nauarre fort contente, partit de
la cour, qui pour lors eſtoit à Bloys, pour s’en aller
à Paris. L’Amiral auſsi s’eſtoit retiré auparauant
en ſa maiſon de Chaſtillõ, où il receuoit
ſouent letres & meſſages du Roy, qui luy demãdoit
ſon conſeil és affaires occurrens, eſquels il monſtroit
ne vouloir rien refoudre d’importance, ſans
ſon auis.
La royne de Nauarre au partir de la cour, eſtant
venue à Paris, tomba malade, & cinq iours
apres mourut, en l’aage de 43. à 44. ans, d’vn boucon
qui luy fut donné à vn feſtin, où le duc d’Aniou
eſtoit, ſelon que i’ay ouy dire à vn de ſes
domeſtiques : dont on ne voulut parler, de peur que
ce fuſt occaſion de rompre ledict mariage, deſiré
de tous les amateurs de paix & ſans ſoupçon.
Ali. Le Seigneur a accouſtumé de retirer en vne façon ou en l’autre, ſes bien-aimez en paix, quand
il veut faire venir quelque mal ſur ſon peuple :
Ainſi le promit-il & l’obſerua à Ioſias roy d’lſrael,
pour un ſingulier benefice.
