1. Sæpè dum Christi populus cruentis
Hostis infensi premeretur armis,
Venit Adjutrix pia Virgo, cœlo
Lapsa sereno.
2. Prisca sic patrum monumenta narrant ;
Templa testantur spoliis opimis
Clara ; votivo repetita cultu
Festa quotannis.
3. En novi grates liceat Mariæ
Cantici lætis modulis referre ;
Pro novis donis resonante plausu
Urbis et orbis.
4. O dies felix, memoranda fastis,
Qua Petri sedes fidei Magistrum,
Triste post lustrum reducem, beatâ
Sorte, recepit.
5. Virgines castæ, puerique puri,
Gestiens clerus, populusque gratus
Corde Reginæ celebrare cœli
Munera certent.
6. Virginum Virgo, benedicta Jesu
Mater, hæc auge bona : fac, precamur,
Ut gregem pastor pius ad salutis
Pascua ducat.
7. Te per æternos veneremur annos,
Trinitas, summo celebrando plausu ;
Te fide mentes resonoque linguæ
Carmine laudent.
