Page:Rutebeuf - Oeuvres complètes, recueillies par Jubinal, tome II, 1839.djvu/277

270

NOTES

Riches fu d’or et de pecune,
Et tost le desmonta Fortune.
Fortune, qui le roe torne
En pau d’eure, si le destorne
Que de Diu l’a tot destorné ;
Tant l’a Fortune tost torné
Que il fist au déable oumage.
Certes, il n’ot pas le cuer sage.
Or escoutés com grant meskief,
Del sanc méisme de sen kief
Escrist le carte et le sael,
Et dounée au mavais kael,
En si grant povreté kaï
Que Diu et ses sains en haï.
Si fu kaüs en despéranche
Que Diu maudist et sa créanche ;
En ort peciet si se noia
Que le cors Diu en renoia ;
Mais ainc sa Mère renoier
Ne vaut, ainçois s’alast noier,
La très douce Virge pucele,
Qui de Dieu est mère et ancele ;
Car ançois que li anemis
L’éust en cele dolor mis
L’avoit sur tote riens amée
Et Dame et amie clamée.
En grant hautèce fu remis
Cil qui de Diu se fu demis.
Sa vie a éu si lonc tans,
De çou ne sui-jou pas mentans.
Devant une bele capele
C’om de la mère Diu apele
Theophilus .i. jor passa,
Qui mult fort en son cuer pensa ;
Li capelete fist al kans.
Theophilus oï les kans
Canter de la mère Diu douce :
Teus repentance au cuer li toce
Et tés pités qu’il se pasma.
Au relever las se clama :
« Elas ! que sui-jou devenus ! »
Devant l’image en est venus :
Allé fu tant à orissons,
A genillons, si com lissons,