Mieulz qu’orgueilleux juste ne face,
Et plus tost li done sa grâce.
L’umble Reïne, l’umble ancele,
L’umble Dame, l’umble pucele
En qui Dieux prist humanité
Met en noz cuers humilité,
Et tout orgueil en doinst fors mestre.
Qui se voudra bien ademestre
A lui servir, bien le sachiez,
Jà si n’ert orz ne si tachiez,
Ne d’ort péchiez si débavez
Par lui ne soit tout eslavez.
Qui bien la sert ne puet périr :
Ele est tant large de mérir
Touz les servises c’on li fet
Que tuit sont riche, et ce fet
Cil qui bien son servise font.
Douz Dieux, com tuit cil se refont
Qui ta très douce mère honorent
Et en sa vingne bien laborent[1] !
N’est nus, s’entrer velt en sa vingne,
N’ait son denier, tant tart y viengne.
Touz li mondes la doit servir,
Car nus ne porroit deservir
Le grant loier que cil reçurent
Qui à lui sont et qui l’aeurent ;
Tuit cil sont riche et recovré
Qui un seul jor i ont ovré.
Théophilus bien i ouvra,
Car en son reigne recouvra
Ce qu’il ne péust recouvrer
En ovraingne où seult ovrer.
Riches sodées li paia
Quant à son Fil le rapaia
Qu’avoit guerpi et renoié.
Dervé sont tuit et forvoié
Cil qui à lui servir ne corent
Et en sa vigne ne laborent ;
Car ele paie assez souvant
Mil tanz qu’ele n’a en convant.
De bien paier par est si tendre
- ↑ Ms. 6987. Var. Se norent.
