mauuais traictement qu’ils pourroient recevoir, et que par apres ie me ferois voir.
Nous approchasmes donc de ces cabanes, et leur parlasmes ; mais ces pauures gens ne nous dirent aucune chose qui nous peust desplaire : car ils ne songeoient simplement qu’à leur pesche et à leur chasse, et par ainsi nous reprismes promptement nostre route, et allasmes passer par vn lac, et de là par la riuiere qui conduit au village, laissant à main gauche le droit chemin de Kebec. Ie loue mon Dieu en toutes choses, et le prie que ma peine et mon trauail soit agreable à sa diuine Majesté : mais il est vray que nous pensasmes perir ce iour-là par deux fois, auant qu’arriuer à ce village, en deux endroicts fort perilleux, assez pres du saut du lac qui tombe dans la riuiere, et puis nous descendismes dans vn certain endroict tout couuert de fraizes, desquelles nous fismes nostre meilleur repas, et reprismes nouuelles forces d’acheuer nostre iournée, iusques à nos gens de l’Isle, où nous arriuasmes ce iour-là mesme, apres avoir faict vingt lieuës et plus de chemin.
Ô pauure peuple, combien tu es digne357||de compassion ! i’aduoüe que tu es le plus superbe et reuesche de tous ceux que i’ay point veu. Vien maintenant au deuant de nous, et dispose tes troupes pour nous attendre de pied coy au port où nous deuons descendre, ne pouuans euiter ta veuë et tes insolences, bornées et arrestées pourtant à la seule voix d’vn pauure Religieux Recollet de sainct François, que tu crois estre Capitaine, et n’est qu’vn pauure et simple soldat et indigne seruiteur d’vn Iesus-Christ crucifié, et mort pour nous en Croix.
