d’Erable tout neuf, a belles anses du boys mesme : lequel (certes) a esté faict de la main d’un excellent ouvrier : car en son millieu est taillé le rouge Priapus embrassant une Nymphe bien serré, & la veult baiser maugré qu’elle en ayt, dont elle enstambée de cholere, tourne le visaige en derriere, & faict tous ses effortz de s’en desvelopper, luy esgratignant le nez de sa main gauche, & de la droicte arrachant sa rude barbe. A l’entour d’eux sont troys enfans nudz, pleins d’admirable vivacité : l’un desquelz, employe toute sa force pour oster a Priapus la faucille de la main, ouvrant puerilemêt ses gros doiz, l’un apres l’autre. Son compagnon grinsant les dent, le mord tant qu’il peult en la iambe velue, & faict signe au troysieme qu’il leur vienne ayder. Mais pour autãt qu’il s’amuse a faire une petite cage de ionc & de paille pour enfermer (peult estre) des grillons, il ne faict compte d’aller au secours, & ne se bouge aucunement de sa besongne. De tout cela ce dieu lascif faisant bien peu d’estime, restrainct de plus en plus la belle Nymphe contre soy, totalement deliberé d’executer son entreprinse. Encores est ce mien vaisseau par le dehors environné d’un chapeau de pimpinelle verde, entrelaßé d’un rouleau contenant ces paroles :
Page:Sannazare - L'Arcadie, Martin, 1544.djvu/46
Le texte de cette page a été corrigé et est conforme au fac-similé.
L'ARCADIE.
De
