qu’il y avoit eſté, le Prince Mazare eſtoit arrivé fortuitement en cette Solitude ; & que depuis cela, Beleſis & luy avoient lié une amitié ſi eſtroite, qu’ils s’eſtoient promis de ne ſe quitter jamais, & de mourir en ce Deſert. Mais, luy dis-je, à quoy employent ils tous les jours ? à ſe pleindre, & à ſe promener quelqueſfois ſeuls, & quelqueſfois enſemble, repliqua t’il ; ils ont auſſi quelques Livres : car je vous ay deſja dit qu’au commencement que mon Maiſtre choiſit cette Grotte pour ſa demeure, j’y aportay tout ce que je creus la luy pouvoir rendre la moins incommode ; & en effet ces deux illuſtres Solitaires ſont ſi bien accouſtumez à la vie qu’ils menent, que je croy qu’ils auront aſſez de difficulté à ſe reſoudre de la changer. Cependant il eſt certain que je ne penſe pas qu’ils y puiſſent vivre longtemps : & je m’eſtonne, adjouſta t’il, qu’ils ne ſont deſja morts, veû l’extréme melancolie qui les poſſede. Arcas ayant achevé de parler, & de me monſtrer tout ſon Jardinage, me laiſſa reprendre le chemin du lieu où l’avois laiſſé le Prince Mazare avec Beleſis : & s’en alla prendre ſoin de mon cheval, qu’il mit avec celuy que mon Maiſtre avoit amené à ce Deſert. l’eſtois encore un peu embarraſſé, à comprendre comment ils faiſoient quand il eſtoit nuit ; mais j’en fus bientoſt eſclaircy ; car je vy lors que le ſoir fut venu qu’en divers endroits à l’entour de la Grotte, il y avoit pluſieurs morceaux de cette Roche tranſparente, qui ſe jettant hors d’œuvre, eſtoient creuſez par dedans : & remplis d’une eſpece d’huile qu’Arcas tiroit des Therebinthes, dont il y avoit abondance dans ce Bois ; qui ayant auſſi quelques Cotonniers, faiſoit que ce fidelle Eſclave de Beleſis avoit tout ce qu’il faloit
