pour eſclairer cette admirable Grotte : qui me ſembla encore incomparablement plus belle, lors que ces Lampes ruſtiques furent allumées, qu’elle n’avoit fait au jour.
Les lias de ces deux malheureux exilez eſtoient meſmes aſſez propres & aſſez commodez, quoy qu’ils ne fuſſent faits que de Jones, de Mouſſe, & de Roſeaux : & quoy qu’ils ne ſe fuſſent guere ſouciez de chercher les choſes qui leur eſtoient agreables. Le Prince Mazare eſtoit meſme ſi accouſtumé à la melancolie, qu’il ne pouvoit preſques ſe reſjouïr : & Beleſis tout affligé qu’il eſtoit, prenoit plus de part à la ſatisfaction qu’il devoit avoir, d’aprendre que Mandane n’eſtoit pas morte, qu’il n’y en prenoit luy meſme : tant ſon ame avoit fait une forte habitude avec la douleur. En effet, trouvant encore quelque ſatisfaction à s’entretenir de choſes triſtes, il me raconta quels eſtoient ſes ſentimens, lors qu’il ſe déroba de Tiburte : il m’aprit qu’ayant fait deſſein d’aller chercher quelque lieu où il ne pûſt eſtre connû, il avoit pris la reſolution de s’aller embarquer en Cilicie, pour paſſer en l’Arrabie deſerte, & y finir ſes jours. Que neantmoins ayant conſulté un Oracle auparavant, le Dieu luy avoit reſpondu qu’il ne le fiſt pas : & qu’il allaſt habiter le Mont Noir en Cilicie, où il trouveroit de la conſolation. j’y vins donc, me dit il, & je creus d’abord que la conſolation que le Ciel m’avoit promiſe eſtoit la mort : car ayant paſſé un jour & demy dans ces montagnes ſans trouver perſonne, je ne doutay point du tout que je n’y deuſſe bientoſt mourir. Mais enfin les Dieux qui me guidoient, m’ayant fait venir icy, & rencontrer Beleſis, qui ſe promenoit dans la grande route du Bois, je luy parlay : & nous connuſmes ſi bien l’un & l’autre, dés que nous
