croyant que tant qu’il ne pourroit ſortir, Beleſis agiroit peut— eſtre contre luy, l’eſprit de Leoniſe ; avoit obligé le Prince de Suſe, à faire en ſorte ſur quelque pretexte que l’on trouva pour cela, de la mettre chez la Reine, juſques à ce qu’il fuſt entierement guery ; de ſorte que ne voulant pas que mon Amy réçeuſt un commandement ſi facheux, je fus le conjurer, de vouloir s’eſloigner de Suſe pour quelques jours : mais il me dit qu’il n’en ſortiroit point, qu’il n’euſt parlé à Cleodore ; & parlé en particulier. Il m’aprit qu’il avoit eſté pluſieurs fois chez elle, mais qu’on luy avoit touſjours fait dire qu’elle n’y eſtoit point, ou qu’on ne la voyoit pas : adjouſtant, que c’eſtoit donc à Hermogene s’il la vouloit poſſeder en repos, à luy procurer l’occaſion de la voir. Voyant donc ſon obſtination, je fus trouver ſon Amy, afin de l’y obliger : mais il n’y eut pas moyen de l’y faire reſoudre. De ſorte que ne voyant point de fin à cette conteſtation, je m’adviſay d’aller trouver Cleodore ſecrettement, pour l’advertir de l’eſtat où eſtoit la choſe, afin que par ſa prudence elle y donnaſt ordre : car comme ils eſtoient tous deux mes Amis, je ne sçavois lequel ſouhaiter qui fuſt heureux, ny lequel je devois preferer à l’autre. Je n’eus pas pluſtoſt dit à Cleodore, les termes où en eſtoient Beleſis, & Hermogene, qu’elle me dit que ce dernier luy faiſoit tort d’aprehender qu’elle ne viſt ſon Amy : elle me parut pourtant fort ſurpriſe, & fort inquiette ; touteſfois elle me parla en ſuitte, avec tant de marque de colere contre Beleſis, que je creûs bien qu’il ne tireroit pas grande ſatiſfaction de ſa veuë. Neantmoins comme il la ſouhaitoit paſſionnément, & que je voyois que je ne pourrois l’obliger à ſortir de Suſe, s’il n’avoit entendu ſon Arreſt
