pour luy, principalement vers la fin, qu’il eut beaucoup de peine à n’eſclatter pas : & à ne donner point de marques trop violentes de ſa jalouſie & de ſon deſespoir. Il changea de couleur diverſes fois : il fit meſme quelque action de la teſte & de la main, qui faiſoit voir ſon inquietude : & levant les yeux vers le Ciel, & les attachant apres fixement dans ceux de Cyrus ; allons trop heureux Prince, dit-il en ſoûpirant, allons à Artaxate, afin d’aller promptement en Lydie : pour voir ce que les Dieux ont reſolu de noſtre deſtin. Apres cela le Roy d’Aſſirie marcha le premier : & ſans attendre que Cyrus luy reſpondist, il ſe mit à s’entretenir luy meſme ſi profondément, qu’il eſtoit aiſé de connoiſtre qu’il ſouffroit beaucoup.
Cependant Cyrus qui ne vouloit pas perdre de temps, ny aller à Tarſe, y envoya un des ſiens remercier le Prince de Cilicie, qui s’eſtoit deſja diſposé à le recevoir : & reprenant le meſme chemin par où ils eſtoient venus, ils joignirent ceux de leurs gens qu’ils avoient laiſſez à ce Pont : & furent rejoindre Panthée dans un Chaſteau, qui eſtoit ſur les Frontieres d’Armenie, où Araſpe l’avoit conduite. Comme elle avoit eſté recommandée de bonne main à Cyrus, il ne vit pas pluſtost Araſpe, qu’il luy ordonna de la faire ſervir avec tout le reſpect deû à ſa condition : & quelque reſolution qu’il euſt priſe de ne la voir point, par le chagrin qu’il avoit eû d’aprendre que Mandane n’eſtoit pas delivrée, & que c’eſtoit ſeulement elle qui eſtoit priſonniere : il changea de deſſein & voulut la voir. Bien eſt il vray qu’il fit preſque un ſecret de cette viſite : parce qu’il ſouhaita que le Roy d’Aſſirie n’en fuſt pas : afin de pouvoir parler de ſa chere Princeſſe avec plus de liberté. Ainſi dés
