d’Ecbatane. En effet lors qu’Ameſtris fut partie, elle luy envoya un Billet, par lequel elle luy commandoit ſi abſolument d’obeir à Ameſtris ; que ſi Aglatidas euſt eu moins d’amour, & un peu plus de raiſon, il luy auroit ſans doute obeï. Cependant voyant enfin qu’il ne feroit pas changer de reſolution à la ſeule perſonne qui le pouvoit rendre heureux, & ne pouvant plus ſouffrir le monde, il reſolut de venir du moins mourir pour voſtre ſervice : de ſorte que ſans tarder plus longtemps, il preſſa ſi inſtamment Ciaxare de le renvoyer aupres de vous, qu’il obtint ce qu’il demandoit. Avant que de partir, il forma pluſieurs deſſeins que j’eus bien de la peine à deſtruire : car il y avoit des inſtants où il vouloit mourir & ſe tuër luy meſme : il y en avoit d’autres, où il vouloit ſe battre contre Megabiſe, contre Artemon, & contre Tharpis : diſant par ſes raiſons qu’il ne pouvoit manquer d’en tuër quelqu’un ou d’eſtre tué par eux : & qu’ainſi lequel que ce fuſt, il luy ſeroit plus advantageux, que de s’en aller ſeulement pour obeïr à Ameſtris. Mais enfin je m’oppoſay ſi fortement à toutes ſes funeſtes reſolutions, que je le contraignis à ſe contenter de partir, ſans ſe porter à toutes ces violences : & j’employay tant de fois voſtre Nom, qu’à la fin il prefera la gloire de venir mourir en vous ſervant à tout autre genre de mort. Mais, Seigneur, ce qu’il y eut de rare en cette occaſion, fut qu’encore qu’Aglatidas ſortist d’Ecbatane par une porte directement oppoſée à celle par où il faloit ſortir pour aller où eſtoit Ameſtris, & qu’il euſt en effet intention de luy obeïr, il ne pût touteſfois en venir à bout : & il n’eut pas fait cinquante ſtades, qu’envoyant tous ſes gens l’attendre à