demeura surpris à ce discours : neantmoins apres avoir esté un moment sans respondre ; je ne suis pas assez bien dans vostre esprit, reprit il, pour vous le dire : & si j’ay à mourir par vostre rigueur, il vaudra mieux que vous ne vous reprochiez à vous mesme que la mort d’un simple Chevalier, que celle du Fils d’un Grand Roy.
Ils en estoient là, lors qu’il vint du monde qui interrompit leur conversation : & comme la Princesse avoit l’esprit un peu esmeû, elle se retira : & ne fut pas plustost arrivée au Chasteau, qu’elle entra dans son Cabinet, où elle apella Martesie. Cette Fille s’estant renduë aupres d’elle à l’heure mesme, elle se pleignit de ce que contre son ordre, elle l’avoit abandonnée : & luy raconta en suitte, ce que mon Maistre luy avoit dit, & ce qu’elle luy avoit respondu. Mais avec tant d’inquietude, qu’il estoit aisé de juger, qu’il y avoit un assez grand combat dans son cœur : & que quelque innocente que fust la passion d’Artamene, sa vertu scrupuleuse n’estoit pas satisfaite de la conversation qu’elle avoit euë aveque luy. Elle trouvoit qu’elle devoit luy avoir parlé plus rudement : & qu’elle devoit l’avoir banny. Mon Maistre de son costé se pleignoit de Mandane & de luy mesme : il ne trouvoit pas qu’il eust bien exageré son amour : il ne trouvoit pas non plus, que la Princesse l’eust assez bien reçeuë : & quoy qu’elle ne l’eust pas exilé, neantmoins il ne trouvoit pas qu’il y eust grand raport, entre ce que Feraulas disoit avoir veû, & ce qu’il avoit entendu. Toutefois il luy demeura un peu d’espoir : & il vescut avec un peu plus de repos, qu’il n’avoit fait auparavant. Il ne voyoit plus la Princesse qu’elle ne rougist : il ne luy parloit plus, qu’elle n’évitast ses regards : & malgré tout cela,
