luy demandois une choſe qu’elle ne devoit pas m’accorder : & pour concluſion elle proteſta, qu’elle ne s’y pouvoit reſoudre. Mais, luy dit Meleſandre, ſi on trouve Thimocrate, & qu’on le face mourir, le ſoufrirez vous mieux ? Ha Meleſandre, luy dit elle, vous n’eſtes gueres moins faſcheux que voſtre Amy, de me preſſer d’une choſe que je ne veux pas faire : & de me contraindre preſques à la vouloir malgré moy. Enfin apres une aſſez longue conteſtation, elle luy dit, que pourveû qu’il trouvaſt une voye qui ne m’expoſast pas, & qui ne luy fiſt rien faire contre la bien-ſeance, elle ſe reſoudroit à me voir : quand ce ne ſeroit, diſoit elle, que pour me gronder de mon opiniaſtreté. Meleſandre ſongeant alors à ce qu’il avoir à luy dire, luy propoſa de faire une viſite chez une de ſes Parentes, qu’elle voyoit quelqueſfois, qui eſtoit une Perſonne de merite & de vertu, chez laquelle il me meneroit la nuit auparavant qu’elle y deuſt aller. Mais, luy dit elle, que penſeroit de moy voſtre Parente ; qu’en penſeriez vous vous meſme ; & qu’en penſeroit Thimocrate ? Non non, Meleſandre, je ne sçaurois me reſoudre à cette innocente aſſignation : & en effet il ne gagna rien ſur ſon eſprit de tout ce jour là. Mais le lendemain ayant encore penſé eſtre pris, & ayant eſté contraint de changer de nouveau le lieu de mon Azyle ; la crainte d’eſtre cauſe de ma mort l’y fit reſoudre : & elle conſentit à me voir chez la Parente de Meleſandre ; pourveû qu’elle & luy fuſſent preſens à noſtre converſation. De vous repreſenter ma joye, lors que je sçeus que je verrois Teleſile, il ne me ſeroit pas aiſé : elle fut ſi grande que je ne ſongeay pas ſeulement que je