Cependant Theanor n’eſtoit pas moins en inquietude que moy : car pour vous deſcouvrir la verité, il eſtoit amoureux d’Alcidamie : & c’eſtoit veritablement luy qui avoit perdu ce Portrait, & qui n’avoit oſé me l’advoüer. Car comme j’eſtois avez jeune, il n’avoit pû ſe reſoudre à confier d’abord à ma diſcretion : & il avoit creu pouvoir tirer cette Peinture de mes mains par adreſſe, & ſous le nom d’un autre. Mais remarquant enfin que je devenois ſon Rival, il ne sçavoit quelle reſolution prendre, & nous eſtions tous deux bien embarraſſez. Car Theanor sçavoit qu’Alcidamie le haïroit eſtrangement, ſi elle aprenoit que ce Portrait trait fuſt à luy : & je craignois auſſi extrémement que la choſe ne fuſt de cette ſorte. Je m’informay alors à diverſes Perſonnes ſi Theanor avoit eſté amoureux d’Alcidamie : & je sçeus pour mon malheur, qu’il l’avoit eſté, & qu’il l’eſtoit encore, le vous laiſſe donc à juger, combien j’eſtois affligé : j’aimois Theanor par inclination, par raiſon, & par devoir : eſtant certain qu’il m’avoit rendu office de fort bonne grace aupres de Polycrate ; & qu’il avoit pris mon parti avec beaucoup de chaleur contre Timeſias, dont je vous ay deſja parle : de ſorte que je connoiſſois bien que c’eſtoit choquer la generoſité, que de ne combattre pas ma paſſion. Auſſi fis-je tout ce que je pûs pour m’y reſoudre, mais il ne fut pas en mon pouvoir : & l’amour s’emparant abſolument de mon ame, affoiblit tellement l’amitié que j’avois pour Theanor, qu’il y avoit des momens où malgré moy j’en avois quelque confuſion. Alcidamie pourtant eſtoit touſjours la plus forte dans mon cœur : & il m’eſtoit plus aiſé de me reſoudre à perdre mon Amy, que de quitter ce que j’aimois
