vous devez ſouffrir que Leontidas faſſe la meſme choſe. Quand l’ay commencé de l’aimer, pourſuivis-je, je ne sçavois pas que vous l’aimaſſiez : Mais aujourd’huy que l’Amour eſt Maiſtre de mon cœur, il n’eſt plus temps de le vouloir combattre. Theanor voyant que je sçavois ſa paſſion, ne la voulut pas nier abſolument : il me dit donc qu’il eſtoit vray qu’il avoit aimé Alcidamie, comme tout le reſte de la Court l’avoit aimée : Mais qu’il eſtoit vray auſſi, que par des raiſons qu’il ſouhaittoit que je devinaſſe, il faiſoit tout ce qu’il pouvoit pour vaincre ſa paſſion. Enfin il sçeut ſi bien à travers l’obſcurité de ſes paroles ambiguës, me faire entendre clairement, que la raiſon pour laquelle il ſe retiroit de cette amour, eſtoit parce que le Prince Polycrate en avoit une ſecrette pour Alcidamie, que je ne l’entendis que trop. Ha mon cher Theanor (luy dis-je en l’embraſſant tout mon Rival qu’il eſtoit, parce que Polycrate m’eſtoit encore plus redoutable que luy) je sçay deſja ce que vous dittes : & pluſieurs choſes me l’ont apris. Theanor qui penſoit avoir inventé ce qu’il venoit de me dire, afin de me deſtacher du ſervice d’Alcidamie, fut bien ſurpris de m’entendre parler ainſi : & par un ſentiment jaloux, craignant à ſon tour d’avoir dit une verité, en penſant dire un menſonge : il me preſſa de luy aprendre ce que je sçavois de cette amour de Polycrate, qu’il penſoit eſtre ſi ſecrette, diſoit il, que perſonne du monde ne la sçeuſt que luy. Mais moy qui n’eſtois pas moins curieux qu’il l’eſtoit, luy juray qu’il ne sçauroit pas ce que je sçavois, s’il ne me diſoit le premier, comment il pouvoit expliquer tout ce qu’il m’avoit dit autreſfois du Portrait d’Alcidamie, qu’il m’avoit aſſuré avoir eſté
