tant d’heur, & tant de prudence : qu’il y avoit plus de ſix heures que ce Chaſteau eſtoit pris, que ceux d’Artaxate ne le sçavoient pas encore. En fin apres avoir bien conſulté, le Roy d’Armenie conclut, qu’il ne faloit point attaquer un Prince, accouſtumé de combattre comme un Lion, & de vaincre tout ce qui luy reſistoit. Le Prince Phraarte, qui eſtoit aſſez brave, vouloit bazarder la choſe, à quelque prix que ce fuſt : mais ſon advis n’eſtant pas ſuivy, parce qu’un Chef experimenté, ſoutint qu’il n’y avoit nulle aparence d’aller choquer avec des Troupes nouvelles & des Bourgeois, des Troupes aguerries, & le plus Grand Capitaine du monde poſté avec quelque avantage : Cyrus eut la ſatisfaction d’avoir pris ce qu’il vouloit prendre, à la veuë de ſes Ennemis : & de leur avoir preſenté la Bataille, depuis le matin juſques à la nuit, ſans qu’ils euſſent oſé l’accepter, quoy qu’ils fuſſent vingt fois plus que luy. La nuit tombant tout d’un coup, cacha une partie de la honte qu’avoient tous les Habitans d’Artaxate, de rentrer dans leur Vil le apres avoir ſeulement veû prendre un Chaſteau qui leur eſtoit tres conſiderable, à cauſe de l’Araxe qui y paſſe. Cependant Cyrus n’avoit pas l’ame tranquile ; & cette grande action ne luy donnoit que de la douleur : car il avoit ſe fortement eſperé de delivrer la Princeſſe Mandane, qu’il ne pouvoit ſe conſoler de ne l’avoir pas fait. Auſſi toſt qu’il eut donc veû que toutes les Troupes eſtoient rentrées dans la Ville, & qu’il eut poſé des Gardes avancées de ce coſté là, il fut paſſer le reſte de la nuit au Chaſteau qu’il avoit pris. Apres s’eſtre informé de la ſanté du Prince Artibie, qu’on luy dit eſtre fort mauvaiſe, & avoir sçeu que la Princeſſe de Pont eſtoit retiré : il
